முத்தரப்பு ஒருநாள் தொடர்: பாகிஸ்தான் அணியின் பிளேயிங் லெவன் அறிவிப்பு!

ஐசிசி சாம்பியன்ஸ் கோப்பை கிரிக்கெட் தயாராகும் வகையில் பாகிஸ்தான், நியூசிலாந்து மற்றும் தென் ஆப்பிரிக்க அணிகள் இணைந்து முத்தரப்பு ஒருநாள் தொடரில் விளையாடி வருகின்றன. மொத்தம் 4 போட்டிகள் கொண்ட இத்தொடரில் முதலிரண்டு போட்டிகள் முடிவடைந்த நிலையில் மூன்றாவது போட்டியானது இன்று (பிப்ரவரி 12) தொடங்கவுள்ளது. 

லாகூரில் உள்ள கடாஃபி கிரிக்கெட் மைதானத்தில் நடைபெறும் இப்போட்டியில் தென் ஆப்பிரிக்கா மற்றும் பாகிஸ்தான் அணிகள் பலப்பரீட்சை நடத்தவுள்ளன. இதில் இரு அணிகளும் இத்தொடரில் விளையாடிய முதல் போட்டியில் அடுத்தடுத்து தோல்விகளைச் சந்தித்துள்ளன. இதனால் இப்போட்டியில் வெற்றிபெறும் அணி இறுதிப்போட்டிக்கு முன்னேறும் என்பதால் இப்போட்டியில் எந்த அணி வெற்றிபெறும் என்ற எதிர்பார்ப்புகள் அதிகரித்துள்ளன. 

இந்நிலையில் தென் ஆப்பிரிக்காவுக்கு எதிரான ஒருநாள் போட்டியில் விளையாடும் பாகிஸ்தான் அணியின் பிளேயிங் லெவனை அந்நாட்டு கிரிக்கெட் வாரியம் இன்று அறிவித்துள்ளது. முகமது ரிஸ்வான் தலைமையிலான இந்த அணியில் இரண்டு மாற்றங்கள் செய்யப்பட்டுள்ளது. அதன்படி நியூசிலாந்துக்கு எதிரான போட்டியில் காயமடைந்த வேகப்பந்து வீச்சாளர் ஹாரிஸ் ராவுஃபிற்கு இப்போட்டியில் ஓய்வளிக்கப்பட்டுள்ளது. 

அதேசமயம் முதல் போட்டியில் பேட்டிங்கில் சோபிக்க தவறிய காம்ரன் குலாமிற்கும் இப்போட்டிக்கான பிளேயிங் லெவனில் வாய்ப்பு வழங்கப்படவில்லை. இதன் காரணமாக மற்றொரு நட்சத்திர வீரர் சௌத் சகீல் மற்றும் வேகப்பந்து வீச்சாளர் முகமது ஹொஸ்னைன் ஆகியோர் பிளேயிங் லெவனில் சேர்க்கப்பட்டுள்ளனர். இதுதவிர்த்து முதல் போட்டியில் விளையாடிய வீரர்கள் பிளேயிங் லெவனில் தங்கள் இடங்களைத் தக்கவைத்துள்ளனர்.

பாகிஸ்தான் பிளேயிங் லெவன்: ஃபகார் ஸமான், பாபர் ஆசாம், சௌத் ஷகீல், முகமது ரிஸ்வான் (கேப்டன்), குஷ்தில் ஷா, சல்மான் ஆகா, தயப் தாஹிர், ஷஹீன் அஃப்ரிடி, நசீம் ஷா, முகமது ஹொஸ்னைன், அப்ரார் அகமது

Also Read: Funding To Save Test Cricket

தென் ஆப்பிரிக்கா உத்தேச லெவன்: டெம்பா பவுமா (கேப்டன்), மேத்யூ பிரீட்ஸ்கி, ஜேசன் ஸ்மித், வியான் முல்டர், கைல் வெர்ரெய்ன், மிஹ்லாலி ம்போங்வானா, செனுரான் முத்துசாமி, ஈதன் போஷ், ஜூனியர் தாலா, லுங்கி இங்கிடி, தப்ரைஸ் ஷம்சி